24 de Outubru

Deputada PD “Kontra” Argumentu La’o Hamutuk

Timor Leste agora dadauk maizumenus 80% husi ekonomia rai ida ne’e, depende deit ba fundu minarai, tuir projeksaun ONG La’o Hamutuk katak mina matan Kitan sei maran iha tinan oin (2016) no Bayu Undan sei maran iha 2023, Maibe tuir Deputada husi Bankada Partidu Demokratika - PD, ne'ebe mos kaer pasta hanesan Prezidente Komisaun D, Jacinta Abu Cau Pereira hateten katak keta laran taridu bainhira mina atu maran tamba estado hatene diversifika.

Tuir Jacinta katak Timor Leste nia rikeza barak mak seidauk deskobre.”Tamba ne’e keta laran taridu karik mina rai atu maran ka hotu” hatutan Jacinta ba CJITL iha uma Fukun Parlamentu Nasional, Segunda (11/05).

Alende ne’e tuir informasaun katak kampu mina Kitan ho Bayu Undan ne’ebe mak sei maran iha tempu besik, Jacinta mos hatutan tan katak tuir estimasaun ne’ebe mak iha katak kampo mina kitan ho Bayu Undan ne’ebe mak sei maran iha dois mil e vinte (2020) ka menus produsaun la’os hanesan La’o Hamutuk nia analiza.

Jacinta mos hatutan katak Timor Leste laos garantia deit ba kampo mina Kitan ho Bayu Undan tamba  tuir estudo husi Ministerio Petroliu Rekursus Minerais mos agora halo dadauk hela estudu viabilidade atu indentifika fatin fatin-fatin sira ne’ebe mak atu esplorasaun tan.

Tuir nia, Governo mos iha hanoin atu diversifika ekonomia  nasaun ida ne’e hodi suustenta povu nian moris no komesa ona investe iha seitor sira seluk liu-liu iha seitor produtivo, hanesan agrikultura, turismo, industria, hodi diminui dependesia ba fundu mina tamba rai ne’e iha potensial barak ne’ebe mak atu dezenvolve diak liu tan.

Antes ne’e mos tuir Prezidente & CEO Timor GAP, Francisco da Costa Monteiro hateten katak depois de mina Kitan maran sira mos halo tiha ona joint venture ida ho operador ENI ho Impex hodi identifika bloku ida ne’ebe mak besik mina Kitan.” Rezerva ne’e identifika tiha ona, no hein perfurasaun deit.” Hateten Presidente & CEO Timor GAP ne’e.

Francisco mos hatutan tan katak husi Bloku Ne’ebe mak sira identifika iha joint venture ne’e hamutuk hat (4), hanesan Jahal, Kuda Tasi, Skuila no Krill. “Bloku ne’e haleu hela Kitan, karik iha tinan oin mak Kitan nia produsaun menus, ita bele halo perfurasaun ba kampo ne’ebe mak besik, ne’ebe kitan sei la menus produsaun” hatutan Nia.

Nia mos hatutan katak husi bloku ne’e sei fo reserve 30-40 milloes por barell ne’ebe bele sei ekstende hela moris ne’e. Nia mos hatutan katak tenki optimis oituan,” ita tenki optimis oituan labele pesimista demais” hatutan Francisco baihira halo presiksaun husi kampo refere.(Niko/CJITL)

Naran:
email:
Pub

Meteorolojia