Centru Jornalista Investigativo Timor Leste

Mercado Manatuto Presiza Atensaun

Tersa-Feira, 7 husi Agostu 2012

MANATUTO: Vendedores iha Mercado Manatuto sente triste ho kondisaun mercado ne’ebé kloot. Situasaun ida ne’e, obriga sira fa’an sira nia produtu iha estrada ninin. Sira mós husu para governu foun mai ne’e, atu haree mós kondisaun iha mercado refere.

Clotildes Belo, vendador ida ne’ebé lor-loron faan ninia produtu iha mercado ne’e hateten, iha mercado laran, laiha ona fatin ba sira. Alende ne’e, fasilidade iha mercado laran mós la sufisiente ba vendadores,” dehan Belo ba CJITL iha Manatuto, foin lalais ne’e.

Iha fatin hanesan, vendedor Agostinha Soares mós hateten, maske la iha fatin atu faan sira nia produtu, maibé sira hakaas aan atu faan nafatin iha estrada ninin, para bele susteinta sira nia familia no ajuda sira nia oan ba eskola.

“Ami atu la faan iha ne’e mós ladiak. Tanba, ami nia oan sira atu ba eskola oinsa? Ami atu hasai osan husi ne’ebé?” dehan Agostinha.

Nia husu ba governu foun mai, presiza tau atensaun masimu ba kondisaun merkadu refere. Atu nune’e, vendedores sira la bele faan sasan iha estrada ninin.

Kona-ba kondisoens ne’e, Administrador Distrito Manatuto, Antonio Soares hateten governu iha ona planu atu halo merkadu foun. Maibé, seidauk remata. Tanba ne’e, nia husu ba vendedores sira atu pasiensia.

“Ami iha ona merkadu foun. Maibé, seidauk bele utiliza. Tanba, seidauk remata. Sei mercado ne’e hotu ona no mós entrega ona ba governo nia liman, ami sei muda hotu vendedoras ba iha mercado foun ne’eba,” dehan Antonio.

Tuir Antonio, mercado foun Manatuto ne’ebé to’o agora iha hela prosesu konstrusaun maka iha Suco Ma’abat. “Maske nune’e, problema foun ne’ebé sei hasoru maka kona-ba transporte ne’ebé halo ligasaun Manatuto Vila-Ma’abat ba-mai. Ida ne’e mós ami presiza halo kondisoens. Sei lae, se mak atu ba hola sasan iha mercado foun ne’e,” dehan Antonio. CJITL/Alin Soares