24 de Outubru

"Nu'u Sira Han Hotu no Ami Tenki Selu $20 ba Polisia Mak Foti Fali Gerobak"

Dili, Nia la temi  naran kompletu, idade minimal trinta cinco  anos (35), uza kalsa badak, faru metan ho hela xapeo bainhira husu hau atu hola nia nu'u ne'ebe fa'an besik tasi ibun, nia mak Luis, vendedor nu'u laloir ida husi Municipiu Baucau.

Bainhira hau han hela nu'u laloir ne'ebe sosa ho dolar ida ($1), nia fo hanoin ba hau katak dalaruma aban hau hakarak sosa nu'u karik sei la hasoru nia iha fatin ne'ebe hanesan tamba loron - loron polisia hamutuk ho sira ne'ebe hamos foer sempre duni nia ho kolega sira ba mai.

"Ami ne'e agora hadau sorte deit, wali kota ho polisia sira duni ami ba mai deit, dala ruma atu subar mos la biban" nia hateten.

Luis mos konfesa liu tan katak, nia sasan hetan ona prende dala ida no lori ba polisia."Sira prende tiha hatama hotu nu'u ho gerobak ba kareta laran, ami tenki ba tuir polisia no fo hela dua puluh dolar ($20) mak bele foti fali gerobak."

"Nu'u sira han hotu no ami tenki selu $20 ba polisia mak foti fali gerobak, tiu ida pernah xoke ema nia kareta tamba deit hakarak halai subar husi walikota" nia hatutan.
Hanesan vendedor nu'u laloir, loron ida nia bele hetan osan $30 husi fa'an nu'u laloir, dala ruma mos bele to'o $40.

"Nu'u ne'e ami sosa fali iha Bebonuk, fu'an ida ami sosa Quarter ($0,25) no fa'an fali satu dolar ($1)" nia esplika.

Iha nia mensajen ikus husu atu Servisu Administrasaun Dili kria fatin ida ne'ebe diak iha besik tasi ibun, hanesan fatin fa'an aifuan nian iha besik Lita Store iha Lecidere, tamba nia rasik halo ona servisu ne'e tinan sanulu no defisil atu buka servisu seluk. (CJITL)

Naran:
email:
Pub

Meteorolojia