Centru Jornalista Investigativo Timor Leste

Ahi Mate Nafatin; Fretilin Ejiji Januario Pereira Halo Esplikasaun

Kuarta-Feira, 30 husi Novembru 2011

Bankada FRETILIN iha uma fukun parlamentu nasional ejiji governu, liu-liu sekretariu estadu elektrisidade,Januario Pereira atu esplika objektivu inaugurasaun central elektrika iha dominggu(27/11) tanba ahi sei mate nafatin.

’”Hau la komprende inaugurasaun ne’e, governu presiza esplika ba povu kona ba motive inaugurasaun ne’e. inaugura ho razaun ahi ne’e mate ka inaugurasun para ahi ne’e lakan” dehan Deputadu FRETILIN, Antoninho Bianco, Terca feira ne'e.

Nune'e mos Deputadu Estanislau da Silva, nia hateten katak governu halo promesa nebe la klaru ba povu.

Hatan ba kritikas, deputados  husi bloku AMP fo razaun katak ahi ne'ebe lakan seidauk kobre parte sul tomak tamba iha failansu tekniku balun no kapital Dili nian nebe area balun sei mate tamba fiu elektrisidade balun hetan estragu husi ai nebe ema tesi. (Amandio Magno/CJITL)