Centru Jornalista Investigativo Timor Leste

CNE Sei Koopera ho PNTL Hamoos Atributu Parpol

Tersa-Feira, 24 husi July 2012

DILI: Komisario Komisaun Nasional ba Eleisaun (CNE), Lucas da Costa hateten CNE sei koopera ho PNTL, atu hamoos atributu Parpol ne’ebé to’o agora sei tau iha fatin publiku iha kapital Dili mós iha distritu.
 
“Prazu ne’ebé determina, remata tiha ona. Ami sei koopera hamutuk ho instituisaun PNTL, hodi hamoos atributo hirak ne’e,” hateten Komisariu Lucas, Tersa (24/07) iha Edifisiu CNE, Quintal Boot, Dili.
 
Tuir  Lucas katak antes ne’e, CNE haruka tiha ona karta ida ba parpol hotu-hotu. Maibé, to’o oras ne’e, parpol hirak ne’e seidauk hamoos hotu atributu partido nian. “Tuir lei, se sira nain lakohi halo limpeza, hakarak ka lakohi tenki hasai fali 10% husi osan subsidiu ne’ebé governu fó ba kada parpol sira, atu nune’e bele koopera hamutuk ho PNTL hamoos atributu hirak ne’e,” dehan Lucas.
 
Nia mós hateten, CNE hein to’o semana ida ne’e maka parpol hirak ne’e seidauk hasai hotu ka hamoos atributu partidu nian, CNE sei foti medidas hodi hamoos atributu ne’ebé oras ne’e dadaun seidauk hamoos. Liu-liu, iha dalan publiku. Tanba eleisaun remata tiha ona no sei hein deit ona atu forma governu foun.
 
Relatorio Orsamentu
 
Kona-ba relatoriu orsamental husi eis kandidatu prezidente ne’ebé konkore iha elisaun Prezidente 2012-2017, tuir Komisariu Lucas hatama hotu ona.  “Agora, relatoriu hirak ne’e iha ona parte financas. Ita hein deit prosesu verifikasaun husi relatorio hirak ne’e,” nia hateten tan.
 
Prosesu verifikasaun, tuir Lucas para bele hatene despeza husi alokamentu osan hirak ne’e. “Ami presiza haree lai, despeza hirak ne’e loos duni ka lae. Kandidatu sira uza duni ba kampanha ka lae,” dehan Lucas.
 
Kona-ba alokamentu osan ba Eleisaun Parlamentar (Elpar) nian? “To’o oras  ne’e, seidauk iha parpol ida ne’ebé hatama sira nia relatoriu. Maske nune’e, CNE sei hein. Mais, ami espera katak semana ida hanesan ne’e sira sei hatama mai ona, atu nune’e CNE haree no verifika relatorio hirak ne’e,” hatutan Lucas. CJITL