24 de Outubru

Deputadu Aureliu: Pasiente Ba Ho Kadeira Roda Fila Mos Ho Kadeira Roda

Dili-Deputadu bankada FRETILIN, Aurelio Freitas, Segunda feira (22/6) lalais ne’e iha uma fukun Parlamentu Nasional, kestiona konaba pasiente ho naran Egidio dos Santos Camara ne’ebe ba halo tratamentu iha Singapura ho kondisaun ne’ebe tur iha kadeira roda no fila mai Timor mos sei nafatin ho kadeira roda.

Tuir Aurelio katak pasiente ne’e ema ida ne’ebe luta mos ba independensia, no nia familia balu mos nudar membru Komite Central segunda jerasaun ne’ebe mate durante funu ba libertasaun da patria, pasiente ne’e sofre moras tamba hetan torturasaun dala barak husi inimigu sira.

“Ema ne’e moras iha Ospital Nasional, ami ba hare no ami koordena ho Ministerio Saude ho Doutor sira no lori ba Singapura atu halo tratamentu, liu tia semana ida ami simu fali informasaun katak Doutor Ospital Singapura sei haruka fila tamba seidauk iha relatorio ka informasaun ruma konaba  prolonga ba nia tratamentu” Aurelio hateten.

Deputadu ne’e mos rekomenda tan ba Ministerio kompetente atu resolve no trata nia hanesan sidadaun ka ema veteranus ida atu hetan asesu saude iha rai liur

Iha fatin hanesan, Deputadu Komisaun F ne’ebe trata asuntu saude, Virgilio Hornai kestiona mos kona ba politika governu nian ne’ebe  atu limita transferensia pasiente ba rai liur, maibe governu mos iha obrigasaun tenke kria kondisoens iha rai laran atu pasiente sira bele hetan tratamentu ne’ebe dignu.

“Hau hanoin antes atu foti desijaun tenke halo evaluasaun fila fali ba politika ne’e atu nune’e labele foti desizaun depois sakrifika fali ita nia povu ne’ebe lolos sira nia vida ne’e sei bele salva” Lamenta Hornai.

Nia mos husu ba Ministra Saude atu halo evaluasaun ida ba autoridade administrasaun Ministeriu Saude ne’ebe serbisu ba transferensia pasiente nian no husu mos labele kestiona konaba osan ne’ebe uja hodi selu pasiente ne’ebe halo transferensia nune’e hodi fo resposta mais rapido ba pasiente. (Armando Barreto/CJITL)

Naran:
email:
Pub

Meteorolojia