Centru Jornalista Investigativo Timor Leste

Jose Belo: Hau Entrega Fali Medalha Tamba Prezidente Halo Ami nia Jornal Taka

Segunda-Feira, 16 husi Janeiru 2012

Eis Direitor Tempo Semanal, Jose "Taraleu" Belo ba CJITL konfirma katak nia entrefa fali medalha no serfikadu ne'ebe Prezidente ofrese ba nia iha loron 30 Augusto 2009 tamba premiu ne'e laiha ona folin.

"Iha tinan 2010 ami nia jornal halo kontratu ida ho Prezidente Republika ho montante $142.000 atu haruka jornal ba eskolas no administradores sira iha distritus maibe Prezidente la selu kustu distribuisaun jornal tuir kontratu ne'ebe iha" hateten Belo, Segunda feira ne'e (16/1).

Tuir Belo katak iha tinan 2011 jornal ne'e gasta osan hamutuk $93.523 ba kustu produsaun no distribuisaun maibe bainhira halo invoice ba Prezidente atu selu fali kustu ne'e, Prezidente rejeita atu selu ho razaun katak jornal ne'e la fahe ba distrito.

"Ami semana semana halo distribuisaun, agora Prezidente dehan fali ami la halo, tan ne'e mak hau senti katak konfiansa prezidente ba hau ne'ebe hanesan melhor jornalista iha tinan 2009 la folin buat ida" Belo hateten tan. (CJITL)