01 de Marsu

Projeitu Hari Prizaun Suai, Comisaun Nasional Aprovizionamentu “Fase Liman”

Dili- Governu Timor Leste hari dadaun komarka foun ida iha municipiu Covalima hodi responde ba fatin prizioneriu ne’ebe nakonu ona iha prizaun Becora no Gleno, maske nune’e konstrusaun komarka foun refere sai kontraversial hafoin ofisiais Ministeriu Justica ho Comisaun Nasional Aprovizionamentu (CNA) dun malu atu fo informasaun lolos konaba prosesu tenderizasaun ne’ebe oras ne’e kaer husi kompanhia Mar Vermelha.

Besik fulan ida ona reporter CJITL tenta atu halo entervista ho Direktor Comisaun Nasional Aprovosionamenu (CNA)  Aniceto do Rosario,iha nia servisu fatin hodi husu kona ba prosesu tenderizasaun no pagamentu ba kompañia hirak ne’ebe compete hodi kaer konstrusaun komarka foun iha Covalima maibe Direitor ne’e sempre ses an husi jornalista.

Antes ne’e repoter CJITL halo ona entervista ho Eis Ministru Justisa ne’ebe mos Aktual Ministru Estatal, Deonisio Babo, konaba kontratu projeitu ne’ebe nia rasik asina, maibe Eis Ministru ne’e rasik rejeita fo komentariu hodi rekomenda deit reporter CJITL atu ba hasoru deireta ministru Justisa actual Ivo Valente.

Antes ne’e Direktor kompañia Mar Vermella, Egas dos Reis  afirma instalasaun prizaun foun iha Municipiu Suai liu husi prosesu naruk inklui kompetisaun ho kompainia internasional mak manan hodi hari obra ne’ebe dadaun ne’e atinji ona porsentu hitu nulu (70%).

Ba reporter CJITL Kuarta-feira (16/04/15) iha restaurante  ARY Bakery & kafé, Egas esplika antes kompanhia Mar Vermella kaer obra ne’e, kompañia rasik  halo kompetisaun ho kompanhia barak liu husi tenderizasaun Comição Nascional Aprovisionamento (CNA).

“Hau kompete ho ne’ebe compete ho ema internasional no nasional, ne’ebe iha momentu halo  kompetisaun, fofoun iha kompainhia ualo (8) passa  ba teknikal hela haat (4) pasa ba faze selesaun financial hela  rua (2) no seleksaun ikus hamu mak manan.” Egas konfirma.

“Hau nia kompañia merese manan tanba ofrese presu kapas no dokomentus merese duni atu pasa, ho ida ne’e maka ekipa CNA deside katak Kompañia Mar Vermella mak hetan oportunidade hodi kaer obra ne’e” Nia hatutan teni.

Relasiona ho asuntu refere, hafoin CJITL hein besik fulan ida, iha loron  12 Maiu tuku 10.00 dader, CJITL hetan deit karta despacho ida husi Direitor  CNA maibe Aniceto do Rosario ho liafuan hateten katak “Prosesu iha ona implemantasaun ne’ebe progresu fisiku ba intervista ho Dono de Projekto Ministerio da Justisa,  Exekusaun kontratu ne’e laos ona kompetensia CNA”.

Direitor Nasional  Servisu Prizaun, Ministeriu Justica, Helder  Cosme Marsal Belo konfirma katak dadur na’in atus ida rua nulu (120) oras ne’e seidauk simu nia sentensa husi  dadur na’in atus lima ha’at nulu resin ha’at (544) ne’ebe oras ne’e halo nakonu Prizaun Gleno no Prizaun Becora.

Ba Reporter CJITL, Kuarta feira ne’e (8/4), Helder haktui katak dadaun ne’e Ministeriu Justica rejista dadur hamutuk na’in atus lima ha’at nulu resin ha’at (544) ne’ebe kompostu husi Prizaun Gleno rejista dadur na’in ualo nulu resin hitu (87) no Prizaun Becora rejista dadur na’in atus ha’at lima nulu resin hitu (457).

“Dadur ne’e husi tinan ba tinan aumenta hela deit no dadur aktual 2015 ne’e ita  iha gleno sentensa iha  74 no preventiva  13 total hamutuk 87 iha becora sentensa iha 350  preventiva 107  no total hamutuk 457, total prizioneiru husi prizaun rua ne’e hamutuk  544” Direitor ne’e esplika.

Iha parte seluk, prizaun foun ne’ebe hari dadaun atinji ona porsentu 70 (%) maske pagamentu segundu faze seidauk hala’o maibe kompanhia nain promete atu entrega konstrusaun refere iha tempu besik.

Tuir Egas, hanesan na’in ba kompanhia ne’ebe executa projeitu ho montante  orsamentu hamutuk U$ 1,078.046.64 ne’e katak, obra ne’e iha uma sanulu resin haat (14) inklui fatin ba guarda prizaun nian.

Nia hatutan, tekniku ne’ebe servisu iha obra mai husi Indonesia no Xina, trabalhador seluk husi Suai oan sira.

Maske atinji ona porsentu hitu nulu (70%), maibe kompañia Mar Vermella seidauk simu pagamentu segunda fase razaun iha mudansa Governu foun.

Projeitu ne’e rasik tuir lolos tenki remata iha Febreiru 2015, maibe iha konfirmasaun ho Direitor Timor oan ne’e katak, prosesu ne’e tarde tamba fallansu material konstrusaun nian barak maka tenki hola husi Indonezia no Australia. (Adry/ CJITL)

Naran:
email:
Pub

Meteorolojia