Centru Jornalista Investigativo Timor Leste

Sociedade Sivil Husu Governu Foun Servisu ho Profesional

Tersa-Feira, 7 husi Agostu 2012

DILI: ONG Luta Hamutuk ne'ebe mos hanesan grupo sosiedade sivil n'eebe halo monitorizasaun ba servisu governu, liu husi Direitor Mericio Akara husu ba kinto governu, ne’ebé kompostu husi Partidu CNRT, PD no Frente-Mudança, atu servisu ho professional para bele responde prioridades ne’ebé durante ne’e, partidu hirak ne’e promete ba publiku no mós hodi responde nesesidade povu nian durante tinan lima nia laran.

Tuir Akara, prioridades ne’ebé importante ba kinto governu maka presiza tau atensaun makaas iha areia infraestrutura, edukasaun no kombate korrupsaun. Tanba, prioridades hirak ne’e maka povu hein hela.

“Liu husi infraestrutura, ita nia povu bele senti kona-ba dezenvolvimentu nasional ne’ebé promote no hakilar iha tempo kampanha no prioridade iha sektor edukasaun atu ita nia labarik sira bele eskola, atu nune’e aban bainrua ita nia matenek sira labele menus. Kona-ba kombate korrupsaun ne’e importante para dezenvolvimentu bele ba oin. Se lae, bele taka dalan ba dezenvolvimentu,” dehan Akara ba CJITL, Tersa (07/08) iha ninia kna’ar fatin, Palapaso, Dili.

Akara mós promete, LH sei koopera hamutuk ho kinto governu, atu nune’e bele hadia dezenvolvimentu nasional. CJITL/Marlito