Centru Jornalista Investigativo Timor Leste

Vizaun PUN ba Distrito Ermera

Kuarta-Feira, 27 husi Juñu 2012

GLENO: Prezidente Partidu Unidade Nasional (PUN), Fernanda Borges hateten bainhira PUN hetan fiar husi povu, liu-liu povu Distritu Ermera, PUN sei realiza promesa ne’ebé PUN halo ona iha komprimisiu kampanha eleitoral durante ne’e, hanesan dezenvolve infraestrutura, nain ba rai, no hadia komunidade agrikultura café.

Borges kesti lia fuan hirak ne’e, liu hosi intervista ida ho radio komunidade Café Ermera, Tersa (26/06). “Ermera, presiza tau atensaun tebes ba programa hirak ne’e. Tanba povu iha distrito ida ne’e, moris ho café. Ermera mós iha hela kondisaun ne’ebé aat. Liu-liu iha area sistema bee moos, estradas, pontes no rai abandonadu. Iha Distritu ida ne’e mós, kuaze 26 rai iha hela kondisaun konflitus,” hatete Borges.

Tamba ne’e, tuir Borges, iha ona PUN nia programa prioridade bainhira manan iha eleisaun parlamentar loron 7 fulan Julhu, atu hadia Lei Rai nian ne’ebé to’o agora sei pendenti hela iha Parlamentu  Nasional, buka negosiasaun hodi hasa’e folin café, fó kapasitasaun ba juventude no inan feto sira (generu). “PUN rasik iha programa barak tebes atu bele halo iha Distrito Ermera, tanba ha’u mós sidadaun ida husi Distrito Ermera,” Borges tenik.

Iha sorin seluk, Borges husu ba Ermera oan atu fó konfiansa ba PUN iha dia 7 de julho, atu PUN bele hadia estradas, bee moos no programa oin-oin ne’ebé PUN iha. Tanba, tuir prezidente PUN ne’e, iha orsamentu jeral 2012 PUN halo ona intervensaun para empresta osan husi Asian Development Bank –ADB (Banku Dezenvolvimentu Asia) atu hadia estradas husi Dili-Liquica no Dili-Ermera. PUN mós iha planu atu hadia estradas to’o iha sub distritus, sucus no estradas sira ne’ebé liga ba distritos seluk.

Iha intervista ne’ebé ho durasaun minutu 17 no transmite direta iha Radio Café Ermera ne’e, Presidente PUN ne’e hato’o mensagem katak, iha loron 7 fulan Julhu, povu tomak halo julgamentu ba partidus 21. Borges husu atu diak liu povu fó fiar no konfiansa ba PUN, atu forma governo hodi nune’e bele aselera desenvolvimentu no infrastrutura ne’ebé ho kualidade. Liu-liu iha Distrito Ermera. */CJITL